8- કમળાબા ની ફિલસુફી (#100ગઝલપ્રોજેક્ટ)

જે મળ્યું છે તે કરોને કામ, હું કરવાનુ તા’ર?
ને પછી કરજો બધો આરામ, હું કરવાનુ તા’ર?

આ બધું પકવાન હોટલનું બર્યું પચતું નથી
એ ભલે ને ખાય આખું ગામ, હું કરવાનુ તા’ર?

લાગે એવું જો કે છે જીવન માથાનો દુખાવો,
ભૈ લગાવી દેવાનું તો બામ, હું કરવાનુ તા’ર?

પ્રભુ જે ચિહ્નો આપે તે લઇ લેવાના આપણે
હોય કોમા કે પૂર્ણ વિરામ, હું કરવાનુ તા’ર?

સાક્ષર

તા.ક. – આ ગઝલનો કાફિયા “હું કરવાનું તા’ર” (શું કરવાનું ત્યારે?) એ કમળા બા નો પ્રિય વાક્યપ્રયોગ હતો અને એમનો ભાવ લાચારીનો નહોતો, પણ “એ તો એવું જ હોય ને!” એવો હતો, એ છેલ્લે સુધી ખુબજ સક્રિય હતા, મોટાભાગના ઘરકામમાં મમ્મીને મદદ કરતા, આ વર્ષે 19મી ફેબ્રુઆરી એ 4 દિવસના કોમા ની સ્થિતિમાં રહ્યા બાદ પૂર્ણ વિરામ થઇ ગયા. આ ગઝલ એમને અર્પણ…

7- કામવાળી બાઈને (#100ગઝલપ્રોજેક્ટ)

જો પડ્યું મરચું વધારે, શું કરું પસ્તાઈને,
કોણ સંભારે મને, વિચારું હેડકી ખાઈને.

“લો સફળ થાઓ”ની એકે નકલ વેચાઈ નહિ,
ગાંડીઓ આપે સલાહો આજકાલ તો ડાહીને.

“આટલી ઓછી રજા!”ની કેમ કરે ફરિયાદ તું ?
છે રજા પણ “વર્ક ફ્રોમ હોમ”*, કામવાળી બાઈને.

દિલના જોડાણ તો મળતા નથી આસાનીથી,
શું કરૂ રાખીને હું આ હાઈસ્પીડ વાઇફાઇને.

સાક્ષર

* IT Field માં જે કામ કરતા હોય એમનું મોટાભાગનું કામ લેપટોપ પરથી જ થતું હોય એટલે જ્યારે જરૂર હોય ત્યારે “વર્ક ફ્રોમ હોમ” કરવાની છૂટ મળે, જ્યારે ઘરનું કોઈ કામ હોય કે ઘરે કોઈ બીમાર હોય.

તા.ક. – અમારે કોઈ કામવાળી બાઈ માટે સોફ્ટ કોર્નર નથી. અમારા ઘરે કોઈ કામવાળી બાઈ નથી. 🙂

6- દિવાળી આવી ગઈ (#100ગઝલપ્રોજેક્ટ)

હોજરીમાં થાય આક્રમણ, તો દિવાળી આવી ગઈ.
પગના અંગુઠાનું ગ્રહણ, તો દિવાળી આવી ગઈ. *

ફોડે તું લુમોની લુમો કે ધરે બક્ષિસ તું,
થાય પૈસાના ધૂમાડા, તો દિવાળી આવી ગઈ.

ધૂળ માં રહેઠાણ તારું જો મળે કોઈ દિવસે,
હે કરોળિયા સમજજે, તો દિવાળી આવી ગઈ.

ગામના દરેક બાળકને મળી ગઈ નોકરી,
શિવકાશી** ને થયું, ચાલો દિવાળી આવી ગઈ.

સાક્ષર

**શિવકાશી એ તામિલનાડુમાં આવેલું એક નગર છે જયાં ભારતના 70% જેટલા ફટાકડા અને દીવાસળીનું ઉત્પાદન થાય છે અને ત્યાંની ફેક્ટરીઓ બાળમજૂરી માટે કુખ્યાત છે.

તા.ક. –
દિવાળીના ફાયદા તો ઘણા છે અને ઉજવાય પણ છે
પણ એક નજર દિવાળીના ગેરફાયદા પર, એટલે આ ગઝલ 🙂

*
એકટાણા, ઉપવાસ અને સલાડનું શરણ નથી ગમતું,
ટ્રેડમિલ અને રસ્તા પર થતું ટાંટિયાનું મરણ નથી ગમતું;
આ બધા સિવાય કોઈ સરળ રસ્તો હોય તો કહો;
આમ પેટ દ્વારા થતું પગના અંગુઠાનું ગ્રહણ પણ નથી ગમતું.
– સાક્ષર

5- બોલો (#100ગઝલપ્રોજેક્ટ)

તરી જાય સાગર ઘણી નાવ બોલો.
અને ટાઇટેનિક ના થયા દાવ બોલો.

નજરને નજરની નજર લાગી ગઈ’તી
નજરને આવી ગયો તાવ બોલો.

તમે આવો સ્વપ્ને ના પાડી છતાંયે
તમારો શું આવો છે સ્વભાવ, બોલો?

તબીબે કહ્યું રૂઝ આવી ગઈ છે
પછી કેમ યાદ આવે ઘાવ બોલો!

સાક્ષર

તા.ક. – પહેલી પાંચ ગઝલ “લગાગા લગાગા લગાગા લગાગા” છંદમાં લખી, હવે છંદ બદલીશ, 20 છંદમાં 5-5 ગઝલ લખવાનો વિચાર છે. આવતા અઠવાડિયાથી નવો છંદ.

4- રાહ જુએ(#100ગઝલપ્રોજેક્ટ)

વરસ શું એ આખી સદી રાહ જુએ.
તમારી જો કોઈ કદી રાહ જુએ.*

હવે માણસોના તો દુર્લભ છે દર્શન!
દેવો દેવીઓ ની છબી રાહ જુએ.

મળે બસ તણખલું જો લખવા છે કાફી,
હૃદય આગની ક્યાં સુધી રાહ જુએ. **

ગઝલ છેવટે તો છપાઈ કબર પર,
મળે દાદ ક્યારે કવિ રાહ જુએ.

સાક્ષર

*ગાઢ પ્રેમમાં ઇંતેજારની પરાકાષ્ટા માટે અથવા જે લોકો હંમેશા મોડા આવતા હોય ( “બસ રસ્તામાં જ છું”) એના માટે શેર
** કવિ ગૌરાંગ ઠાકરનો એક શેર છે:
“આગ હૈયા માં લાગી હો તો લખ
ફક્ત લખવા ની આગ રહેવા દે.”
આ એનો પ્રત્યુત્તર શેર છે. 🙂

તા.ક. – રાહ જુએ, જોવે કે જુવે?

3- હૃદયના ઈરાદા નકારી તો જોજે!(#100ગઝલપ્રોજેક્ટ)

હૃદયના ઈરાદા નકારી તો જોજે
મગજથી કદી તું વિચારી તો જોજે

લગનના વચન સાત પાળે એ પહેલા,
તુ સાતે’ક બટાકા સમારી તો જોજે

વિચારો અમારા છે બૂમરેંગ જેવા,
તુ એને હવામાં ઉડાવી તો જોજે

અમર કરવુ હો જો તને નામ તારું,
તખલ્લુસના નામે સમાવી તો જોજે

સાક્ષર

તા.ક. – આવતીકાલથી 3 અઠવાડિયા ઇન્ડિયામાં 🙂 ગઝલ ક્રમ ચાલુ રહેશે

2 – ખબર નહિ પડે તો!(#100ગઝલપ્રોજેક્ટ)

કઈ વાત કહેવી, ખબર નહિ પડે તો!
મને તારા જેવી, ખબર નહિ પડે તો!

ખુશી માગી લઉં ને મળી જાય પણ એ
કઈ રીતે સહેવી, ખબર નહિ પડે તો!

ખબર જો પડે તો ખબર એ પડે છે,*
ખબર નહિ પડ્યાની, ખબર નહિ પડે તો!

વચન પુરુ કરવા, જઉં યાનમાં હું,**
ને લેન્ડર ગયું ક્યાં, ખબર નહિ પડે તો!

મારું નામ “સાક્ષર”, દે પુસ્તક તો વાંચું,
હૃદય વાંચવાની, ખબર નહિ પડે તો!

સાક્ષર

*અમુક વસ્તુઓની આપણને ખબર નથી પડતી એની ખબર હોય છે, પણ અમુક વસ્તુઓ ખબર નથી એવી પણ ખબર નથી હોતી।
** ચંદ્ર લાવી આપવાનું વચન પૂરું કરવા વિક્રમ લેન્ડરમાં જવાની અને વિક્રમ લેન્ડર સાથેનો સંપર્ક તૂટી જવાની ઘટનાનો કવિ અહીં ઉલ્લેખ કરવા માગે છે. 🙂

તા.ક. –

1.
મેં મારી પત્ની ને પૂછ્યું – કોઈ કાફિયા માટે idea આપ.
પત્ની – ખબર નહિ

2.
મોટાભાગના કવિઓ સદાબહાર કવિતાઓ કે ગઝલ લખતા હોય છે. જે કોઈ પણ સમયમાં વાંચી અને વાગોળી શકાય, જ્યારે હું એવો પ્રયત્ન કરું છું કે મારી કૃતિઓમાં કઈંક સાંપ્રત ઘટના આવરી લઉં (વિક્રમ લેન્ડર આ ગઝલ માં અથવા મગર અને શ્વાન આ કવિતામાં) જેથી જ્યારે હું ફરી પાછો કોઈક દિવસ વાંચું, ત્યારે કોઈક Nostalgic feeling આવે…

1 – ગઝલ મેં લખી છે (#100ગઝલપ્રોજેક્ટ)

બધું મૌન ચીસી ગઝલ મેં લખી છે.
લે પાછી ફરીથી ગઝલ મેં લખી છે.

મગજના બધાએ કમાડો ઉઘાડી,
ઘણી બારીકીથી ગઝલમેં લખી છે.

હતે જો કલમતો ઉપાડી ય લેતે,
અત્યારે તો કીથી ગઝલ મેં લખી છે.

જરા ખોંખારો ખાઈ તુ બોલી જા ‘સાક્ષર’,
ખરેખર ગઝલ આ ગઝલ મેં લખી છે.

– સાક્ષર

તા.ક. – ઘણા બધા લોકોની ફરિયાદ રહી છે (મોટાભાગના મારા પરિવારજનો અને થોડા ઘણાં જે આ બ્લોગ વાંચે છે/વાંચતા હતા) કે હું બહુ લખતો નથી. વાત સાચી છે, 2008માં બ્લોગ ચાલુ કર્યો પછી દર વર્ષે બ્લોગ પોસ્ટ્સ ઘટતી રહી છે…નીચે મૂક્યું છે સબૂત.(છેલ્લા ત્રણ વર્ષમાં બસ 3 જ પોસ્ટ)
ન લખવા માટેના બહાના ઘણા છે, પણ આજે લખવા માટેનું એક બહાનું સૂઝ્યું છે. એ બહાના હેઠળ એવું વિચાર્યું છે કે આવતા 100 અઠવાડિયામાં 100 ગઝલ લખવી (અને થાય તો પઠન કરીને ઓડિયો/વિડીયો મુકવો)

કેમ ગઝલ? છંદોબદ્ધ ગઝલ લખતા શીખાય એટલે.
કેમ 100? સેન્ચ્યુરી મારી એમ કહેવાય એટલે.
કેમ દર અઠવાડિયે? આનાથી વધારે લખું તો લોકો ત્રાસી જાય. (આમાં પણ ત્રાસી જાય એવી શક્યતા ખરી)

કહેવાય છે કે, ન મામા કરતા કાણો મામો સારો…તો તૈયાર છો 100 કાણા અને આંધળા મામાઓ માટે? 🙂

The Ultimate Inspiration is the Deadline” – Nolan Bushnell

હવે પહેલો વરસાદ – Parody કવિતા

વડોદરાનો વરસાદ

(પ્રેરણા: હવે પહેલો વરસાદ – ભગવતીકુમાર શર્મા અને આ ફેસબુક પોસ્ટ)

હવે પહેલો વરસાદ અને બીજો વરસાદ અને છેલ્લો વરસાદ એવું કાંઈ નહિ;
હવે ડાકોર ના ગોટા અને દાળવડા મોટા અને ભજીયા નો સ્વાદ એવું કાંઈ નહિ… હવે પહેલો વરસાદ…

કોઈ દોરીના ટુકડા પર ભીના ભીના લૂગડાં લટકાવે નહિ,
મને ઉની ઉની રોટલી સાથે કારેલાંનું શાક પણ ભાવે નહિ,
કોઈ પાવરકટમાં, કોઈ અંધારપટમાં, આપે માચીસને દાદ, એવું કાંઈ નહિ.
હવે પહેલો વરસાદ અને બીજો વરસાદ અને છેલ્લો વરસાદ, એવું કાંઈ નહીં….

બધી બારીઓ બંધ, નથી માટીની ગંધ, ના’વે ફુદા ટ્યુબલાઈટ સાથે ભમવા,
મળે કાગળ તો હોડી બનાવી ય લઉં પણ ક્યાં જાઉં હોડી લઇ રમવા!!
હવે દેડકાનું ડ્રાંઉ અને ચાતકનું wow, અને મગર ને શ્વાન, એવું કાંઈ નહીં !
હવે પહેલો વરસાદ અને બીજો વરસાદ અને છેલ્લો વરસાદ, એવું કાંઈ નહીં…

– સાક્ષર

તા.ક. – અમેરિકામાં વરસાદ પડે છે ત્યારે શું નથી થતું એની કવિતા…


આજ વરસાદ નથી એમ ના કહેવાય, રમેશ!
એમ કહીએ કે હશે, આપણે ભીના ન થયા.

રમેશ પારેખ

સભર એ રહ્યો

(રાગ- સફર – જબ હેરી મેટ સેજલ)

જેણે એની વાત ટાળી,

એને યાદ આવી નાની ,

તમોને ખબરછે?

કોણ એવું તો સબળ છે?

બતાવો?

આવડે ને તો બતાવો…

જે પણ એની સામે આયા

એણે એવા તો  ઘુમાયા

સહુ કોઈ નાઠા,

આ હું કોની ગાઉં ગાથા?

બતાવું

થોડી વારમાં બતાવું..

એ આમતો છે ડાહ્યો ને આદમી ભલો છે…

પણ આમપા છો ગડબડ એ કરતો રહ્યો છે…

મોટા હો કે નાના ના ભેદ્ભાવ રાખે

એ સૌ ને બૌ મારે
ગોબા પાડી નાખે

જનમ દિવસોનો ફરક ના પડ્યો…

સભર એ હતો ને સભર એ રહ્યો..

એ રહ્યો…

હદો સરહદોનો ફરકના પડ્યો

સભર એ હતો ને સભર એ રહ્યો..

એ રહ્યો…

તાલી, ટપલી, ચીમટી એને ના લુભાવે,

ધક્કા મુક્કાઓ થી એને સારું ફાવે,

લાવે અંધારા, એ આંખે લાવે અંધારા.

એ સવારે જ્યારે જ્યારે જાગે છે,

કુતરા બુતરા ગાયો બાયો ભાગે છે

બધા બિચારા, પશુ પંખીઓ બિચારા…

નગરની નજરમાં કબરએ રહ્યો…

સભર એ હતો ને સભર એ રહ્યો…

જનમ દિવસોનો ફરક ના પડ્યો…

સભર એ હતો ને સભર એ રહ્યો..

ગબ્બર બનવામાં સફળ એ રહ્યો…

સભર એ હતો ને સભર એ રહ્યો..

એ રહ્યો… એ રહ્યો…

-સાક્ષર

તા.ક. – લગભગ ૧.૫ વર્ષ પછી બ્લોગ પર પાછો આવ્યો અત્યાર સુધીનો બે પોસ્ટ્સ વચ્ચેનો સૌથી મોટો ગાળો. જો કોઈ હજુ પણ બ્લોગ વાંચતું હોય તો Thank you!!! 🙂